Skert sjón á öðru eða báðum augum, sem ekki er hægt að leiðrétta að fullu með gleraugum og er ekki orsökuð af greinilegum galla í auga eða sjónboðleiðum.

Sjónþroski barna á sér stað allt fram til 8-10 ára aldurs. Sjónin á lata auganu þroskast ekki á sama hátt og á fríska auganu og er orsökin yfirleitt sú að eitthvað hindrar eðlilega sjón þar. Þetta getur verið af ýmsum orsökum en algengustu eru skjálgi og sjónlagsgallar (mikill munur á sjónlagi augnanna, fjærsýni og sjónskekkja algengast). Þar sem myndin frá lata auganu er ekki skýr (eða veldur tvísýni þegar augun vinna ekki saman) er myndin frá fríska auganu ómeðvitað valin. Þetta hindrar sjónþroska letiaugans.

Mikilvægt er að greina latt auga snemma svo það megi hefja meðferð sem fyrst. Skimun við 4 ára skoðun á heilsugæslu er mikilvæg, því meðferðin þarf helst að fara fram þegar á leikskólaaldri til að hún skili sem bestum árangri.
Börn með skjálgi koma oft fyrr til augnlæknis, þannig að hefja má meðferðina fyrr.

Meðferð við lötu auga er að setja lepp fyrir (eða dropa í) fríska augað, svo að viðkomandi verði að nota lata augað og hvetji þar með sjónþroska þess. Þetta er oft gert í nokkra tíma á dag og mikilvægt að aktíft nota letiaugað við leiki sem sjónrænt örva barnið. Þannig næst bestur árangur.